主頁 > 活動分享 > 人與事 > 只要抱有希望視障兒童都可活得快樂

只要抱有希望視障兒童都可活得快樂

不幸中之大幸滿月才發現女兒視障

曉儀今年14歲，於主流學校就讀中二，由於先天性白內障引起其他併發症，以致現在視力就像有一千度大近視一樣，戴了眼鏡都矇查查。曉儀出生首兩星期到健康院檢查，每次曉儀都睡著，當時醫生說她睡了，應該沒有其他健康問題，便不以為意。但曉儀媽媽心想無理由囡囡時常都在睡覺，平日見她看東西時眼睛怪怪的，於是在她滿月覆診時再問醫生。經仔細檢查後，得知曉儀患有白內障。「當時晴天霹靂，點解係我個女？」曉儀媽媽憶述。她沒有追究，只想盡快為曉儀治療。不幸中之大幸，沒有全失明，但成為視障兒童。

視障女兒自覺和別人沒有分別

媽媽希望女兒面對視障

「她小時特別怕黑，有時我和她爸爸約了朋友外出晚飯，家人打電話告訴我曉儀喊到收唔到聲，我就立即趕返屋企。」一轉眼曉儀已經14歲，和其他中學生一樣，除了應付繁重的功課，她也學琴、長笛，參加合唱團和跳舞等，又會追韓劇和玩手機。「我覺得自己同其他同學無咩分別，只是看東西要近一點。依家我在課室座位上放了一部桌面放大機，用來睇黑板和書本上的文字，又有一部手提放大機，閱讀上基本無咩問題。」曉儀輕鬆地說。

曉儀媽媽在曉儀出世不久就加入賽馬會社區資助計劃－視障兒童家長資源中心（PRC）做會員。「我想曉儀認識多點視障朋友，雖然她覺得自己與健視同學沒有分別，但我相反，我想她面對自己是視障人士。因為她將來嘅路，或多或少與健視人士唔同。」曉儀媽媽說。「加入PRC，認識很多同路人，大家互相鼓勵，心情亦舒懷不少。依家返親PRC參加活動，好似返屋企咁。」

由怕醜仔變得自信開朗

九歲的浤益，因早產致視神經退化，視力不足一成。浤益表面看來活潑，但浤益媽媽說他未加入PRC前自信心不足，又害羞，比較起來，現在自信心增強了、開朗了，亦會主動跟人聊天。浤益說：「我鍾意上話劇班，導師好錫我。我又鍾意PRC嘅張SIR，佢成日同我玩。」

浤益媽媽為浤益在坊間報讀過一些興趣班及參觀活動，但感覺不太好。「始終外面嘅機構唔了解視障兒童嘅特性同需要，過程中見到浤益未能投入活動，活動完結後亦得不到預期嘅效果。反而喺PRC感覺完全相反，所有活動安排顧及我地嘅需要，玩得特別開心。依家帶浤益返PRC參加活動，佢開心時，我亦可鬆一口氣，睇吓書，上吓網，有屬於自己嘅時間。」浤益於學習上發展較慢，身為幼稚園教師的媽媽有時亦會感慨「有時間教到人地嘅仔女，但就唔夠時間教導自己個仔。不過我比較樂觀，對個仔抱有希望，雖然學習或其他發展慢些，但都可找到自己嘅興趣，過自己開心嘅生活。有些媽媽埋怨仔女大個有毛有翼，唔會再依賴父母，但我偏偏期待浤益拍翼高飛的一天，因為這證明了他可以獨立，自己照顧自己，不用要依賴著父母。」

按此瀏覽香港賽馬會社區資助計劃 - 視障兒童家長資源中心

按此瀏覽PRC網上電台

曉儀平時會用手提放大機看文字。